>>>
Fyrstu vatnskælingarnar voru að mestu leyti heimasmíð. Fiskabúrs vatnsdæla keypt í næstu gæludýraverslun, slöngur úr plasti, vatnskassar úr vélhjóli, og blokk úr kopar til þess að leiða hitann frá örgjörvanum yfir í vatnið, annað hvort heimasmíðuð eða keypt. Vatnið á kælinguna kom úr krananum, en oftast bætt í það lausn til þess að draga úr gróður og bakteríumyndun. Það leið þó ekki að löngu þangað til hægt var að kaupa heilu vatnskælingasettin frá framleiðendum eins og Asetek (Waterchill). Þessi sett voru flest þannig að þau þurfti að setja saman inní tölvukassanum, en einnig er hægt að fá vatnskælingar þar sem vatnskassinn er staðsettur utan við kassann.
Ef maður spyrst fyrir um vatnskælingu í verslun á Íslandi í dag er algengt að fá það svar að slíkt sé ekki til. Ástæðan er líklega sú að eftirspurnin hefur minnkað, en einnig að margar verslanir hafa brennt sig á því að selja slíkar kælingar í gegnum tíðina. Lekar úr vatnskælingu yfir rándýran vélbúnað og skemmdir sem geta hlotist af því er eitthvað sem þó nokkrir hafa brennt sig á. Slíkar skemmdir falla ekki endilega undir ábyrgð og það er eðlilega gremjulegt fyrir kaupandann og veldur óánægju. Flestar verslanir eru því tregar til þess að bjóða upp á vatnskælingar. Þessi saga er ekkert séríslensk og það hljómar því ekki undarlega að heyra það að hið danska fyrirtæki Asetek hafi liðið undir lok og hætt að framleiða vatnskælingar, og frystikælingar (Waterchill, Vapochill) í neytanda umbúðum.
Sú vatnskæling Corsair H50 sem hér verður tekin til kostanna er markaðssett af Corsair en í raun hönnuð af fyrirtæki sem er engin nýgræðingur á þessu sviði nefnilega Asetek. Asetek hefur endurskipulagt starfsemi sína og flutt vestur um haf. Asetek selur í dag framleiðslu sína einungis til annarra fyrirtækja til markaðssetningar en ekki einstaklinga.
Corsair H50 vatnskæling sem hér er prófuð var keypt af höfundi þessarar greinar.
Aðeins um Corsair
Corsair hefur verið leiðandi í hönnun og framleiðslu á hágæða minni allt síðan 1994. Það er því eðlilegt að það fyrsta sem manni detti í hug þegar maður sér nafnið Corsair sé minniskubbur. Corsair hefur í gegnum árin aukið á úrvalið og það samansendur í dag, m.a. af: minniskubbum, USB minniskubbum, aflgjöfum, tölvukössum, og vatnskælingu.
>>>
Kassi og fylgihlutir
Umbúðir Corsair H50 vatnskælingarinnar eru snyrtilega og fágaðar í útliti. Öllu innihaldi er haganlega komið fyrir, þannig ansi mikið þarf að ganga á í flutningum til þess að skemma innihaldið.
Fylgihlutir:
• 120mm vifta
• Festingar fyrir LGA1366/775/1156 AMD AM2/AM3
• Leiðbeiningabæklingur
>>>
Nánar um Corsair H50
Corsair H50 er vatnskæling úr áli, kopar og plasti sem passar á alla helstu örgjörvasökkla sem eru í framleiðslu í dag, Intel LGA 1366/1156/775 og AMD AM3 og AM2. Corsair H50 vatnskælingin hefur nægjanlega kæligetu til þess að kæla alla örgjörva sem passa á þessa örgjörvasökkla frá þeim veikustu til þeirra allra öflugustu. Corsair H50 er fyrirfram fyllt með vökva, og kemur sem algjörlega lokað kerfi með innbyggðri dælu. Ekki þarf að skipta um vökva kerfisins eða hugsa um frekara viðhald.
Um leið og maður handfjatlar Corsair H50 virkar vatnskælingin sem vönduð smíð, enda þótt hún beri vörumerki Corsair á hún uppruna sinn hjá fyrirtæki með mikla þekkingu á hönnun og smíði slíkra kælinga. Þetta fyrirtæki er að sjálfsögðu Asetek en þeir sem þekkja til vatnskælinga muna eflaust eftir Waterchill og Vapochill kælingunum. Vörumerki Asetek má finna á Corsair H50 vatnskælingunni sjálfri og kassanum. Asetek er hætt að markaðssetja vörur til neytanda en selur þær í staðin til svokallaðar OEM (original equipment manufacturer, frumframleiðandi) framleiðanda eins og Corsair.
Corsair H50 lofar mikilli kæligetu umfram það sem hefðbundnar viftu loftkælingar hafa. Ástæðan fyrir skilvirkari kæligetu vatnskælingar liggur m.a.í varmarýmd vatns og hversu auðvelt er að flytja þann varma í burt. Koparblokk leiðir varma frá örgjörvanum yfir í vatnið sem síðan er dælt í vatnskassa sem kældur er með viftu. Stöðug hringrás er á vatninu frá koparblokkinni sem liggur yfir örgjörvanum yfir í vatnkassann, virkar í raun ekki ósvipað og kæling bílvélar.
Corsair H50 fær afl úr tveimur 3-pin rafmagnstengjum sem hægt er að tengja við móðurborðið. Kælingin þarf því lítið meira afl en hefðbundin örgjörvakæling en annað þessara 3-pin tengja tilheyrir 120mm viftunni. Hægt er að notast við tvær 120mm viftu önnur blæs inní vatnskassann en hin sýgur út og það eykur kæligetu frekar.
>>>
Samsetning
Fyrir gamlan ref í þessu eins og mig þá er samsetning á Corsair H50 mjög einföld, og í raun ekkert flóknari heldur en að koma öðrum mjög öflugum viftukælingum fyrir. Corsair hefur einnig gert sitt ýtrasta til þess að gera upplýsingar um framkvæmd sem aðgengilegastar m.a. með gerð myndbands þar sem fari er í gegnum samsetningu og með því að bjóða upp á hjálp í gegnum síma.
Í einföldu máli fer uppsetning fram í þremur megin skrefum:
- Taka þarf móðurborðið úr kassanum til þess að koma festiplötu fyrir koparblokkina undir móðurborðinu.
- Vatnskassinn og viftan eru fest aftan á útblástursop kassans að aftan. Viftan er látin soga kalt loft að utan og blása því inn í kassann.
- Koparblokkin með dælunni er fest ofan á örgjörvann með þar til gerðum festingum.
>>>
Prófunarbúnaður
Móðurborð
ASUS P6T X58 Deluxe
Minni
GeIL Ultra 6GB DDR3 PC3-12800 tími 7-7-7-24@1,65v lagt til af Kísildalur.is
Örgjörvi
Intel® Core™ i7 920 retail
Skjákort: MSI R4870 OC Edition
Stýrikerfi: Vista Ultimate 32bit SP1
Skjár: Samsung SyncMaster 245BW
Geisladrif Sony OptiArc AD-5200 DVD+/- 20X SATA lagt til af http://www.tolvuvirkni.is
HD: Segate Barracuda 7200rpm 500GB 32MB
Aflgjafi: COOLER MASTER Real Power M620
>>>
Kæligeta
Kæligeta Corsair H50 var borin saman við Cooler Master Hyper N520 með því að keyra stöðugleika próf Everest Ultimate á örgjörvann í eina klukkustund og við þann tímapunkt er hitastigið lesið. Hitastigið við ekkert (idle) álag var lesið af einni klukkustund eftir að að álagsprófinu (load) lauk. Herbergis hita var haldið við 21 gráðu á meðan á próf voru framkvæmd.
Til þess að krydda ástandið og reyna frekar á kæligetu búnaðarins var Intel Core i7 920 örgjörvinn yfirklukkaður í 3.6GHz. Búnaðurinn var einnig settur þannig upp að 120mm kæliviftan var bæði látin blása út úr kassanum að aftan og einnig sett upp á réttan hátt eða á þann hátt sem Corsair mælir með. Þ.e. blása loftin inn að aftan.
Corsair H50 hefur mikla kæligetu og heldur Intel Core i7 920 nokkuð svölum þrátt fyrir nokkra yfirklukkun og mikið álag.
>>>
Hljóðmyndun
Hljóð var mælt með Velleman DVM 805 hljóðstyrksmælir annarsvegar í eins sentímetra fjarlægð frá kælingunni og hinsvegar í eins metra fjarlægð.
>>>
Samantekt
Corsair H50 er öflug örgjörvakæling, hljóðlát, vönduð smíð og ekkert flóknari í uppsetningu en stórar og öflugar viftukælingarnar. Corsair H50 vatnskælinginn er sú fyrsta sem ég kynnist sem þarf ekkert viðhald, skipta um vatn, hreinsa slöngur o.s.fv, þetta er mikill kostur. Ef maður skoðar verð á allra öflugustu viftuörgjörvakælingunum sem fást hér á landi þá kemur Corsair H50 vel út úr samanburðinum þegar kemur að verði og kæligetu.
Corsair H50 sleppur ekki hér í gegnum skoðun án athugasemd. Helsta athugasemdin snýr að því að einungis sé hægt að staðsetja vatnskassann að aftan í kassanum og að snúa þurfi þeirri kassaviftu þannig að hún blási lofti inn í kassann. Flestir kassar í dag eru hannaðir þannig að þeir taka kalt loft inn að framan með hjálp viftu sem búinn er ryksíu og blása loftinu síðan út að aftan með viftu þar. Það virkar því ekki skynsamlegt að helsta útblástursvifta kassans sé sú vifta sem snúa þarf við til þess að kæla örgjörvann. Þótt búast megi við lækkuðu hitastigi á örgjörva eins og mælingarnar sýndu má búast við að hitastig á skjákorti og kubbasetti hækki ef heitt loft á ekki greiðan aðgang út úr kassanum. Einnig kallar þessi uppsetning á að ryk mun festast í kælielementum vatnskassans en slíkt er leiðinlegt að þrífa, Corsair hefði mátt láta ryksíu fylgja með. Það má vissulega snúa viftunni framan í kassanum á þann veg að hún blási lofti út, en ókosturinn við það er að þá blæs hún heitu lofti framan í notenda tölvunar ef hún er staðsett á borði.
Upphaflega hafði ég hugsað mér að setja vatnskassann á þar til gerðan stað fyrir vatnskælingar framan í Cooler Master CM 690II Advanced kassanum sem búnaðurinn var prófaður í, en sökum þess að slöngurnar milli kæliblokkarinnar/dælunnar og vatnskassans eru of stuttar þá gekk það ekki. Það verður sífellt algengara að kassar séu hannaðir með það í huga að koma vatnskælingu fyrir inn í þeim og það með vatnskassa sem er allt að 2x120mm að stærð. Algengast er að þessi staður sé framarlega og neðarlega í kassanum, en þangað ná slöngur Corsair H50 einfaldlega ekki. Enda er Corsair H50 vatnskælingin einungis hönnuð með það í huga að festa vatnskassann aftan í kassann þar sem klassískt er að staðsetja 120mm útblástursviftu
Flestir sem eru á annað borð að velta því fyrir sér að fjárfesta í svo öflugri kælingu munu væntanlega búa yfir þeirri kunnáttu sem þarf til þess að koma henni fyrir án teljandi vandræða. Uppsetning á Corsair H50 er ekkert erfiðari en uppsetning á öflugri viftukælingu. Einhverjir munu þó án efa lenda í vandræðum og það þrátt fyrir að Corsair hafi gert sitt ýtrasta til þess að tryggja að upplýsingar um framkvæmd séu sem aðgengilegastar og hjálp sé að fá með símtali. En eins og með allar „alvöru“ kælingar sem seldar eru í dag hvort sem þær eru viftukælingar eða annað þá þarf að fjarlægja móðurborðið til þess að koma Corsair H50 fyrir. Hvort uppsetning sé of flókin fyrir þig eða ekki verður þú að meta sjálfur eftir að hafa horft á eftirfarandi myndband frá Corsair.
http://www.youtube.com/watch?v=PUxoFiFuS_g
Fyrir að vera vönduð smíð, hafa mikla kæligetu, vera nokkuð hljóðlát og þrátt fyrir athugasemdirnar sem ég gerði hér að ofan er mjög vel hönnuð fær Corsair H50 tech.is meðmæli.
Copyright Yank 2009
Editor RISI
